Leiho bat zabalik Hitzak |
|
Leiho bat zabalik
(Iñigo Astiz) Leiho bat zabalik Leiho bat zabalik, leiho bat zabalik. Kaleak ez dauka izenik, eta bera ere gorpu da poliziaren izaren azpian. Hartaz geratzen da bakarrik... leiho bat zabalik, leiho bat zabalik. Auzoak ez daki zergatik, beti agurtzen zuten elkar ez daki hil nahi ote zuen edo akaso ez-bizi soilik. Leiho bat zabalik, leiho bat zabalik. Hilabete joan da jadanik, presaka pasa naiz gaur eta iragan da iragana, hartaz geratzen da soilik... leiho bat zabalik, leiho bat zabalik. Nik ez dakit zergatik, inork itxi ez duelako den edo orain beste norbaitek zabaltzen duelako jadanik, leiho bat zabalik, leiho bat zabalik. Spam kanta (Angel Erro) Ez dit mezua erantzuten, ez dago, ez du ikusi. Spam banintz bezala jokatzen du nirekin. Kalean topatuta, “zemuz zauz, aspaldin, Idatzi didazula?, ez esan, nik hori ez dakit. Ea noiz eoten gean hurrengo batin”. Spam banintz bezala jokatzen du nirekin. Posta elektroniko desiratu gabea, Viagra erosteko eskaintza merkea, Nigeriako osaba aberats baten diru eskea, Kostu baxu-baxuko airelinea. Aspaldian isildutako adiskidea. Adimen artifizialeko adeitasun simulagailua Silicon Valleyn dute egina, o behintzat asmatua, zure nortasunean oinarritu erantzunen menua. Googleri-eta, oro har, izaten diet izua, Erakutsi neure burua, haiek ikusten datua. Baina irrikan naiz noiz itzuliko didaten laguna. Posta elektroniko desiratu gabea, Viagra erosteko eskaintza merkea, Nigeriako osaba aberats baten diru eskea, Kostu baxu-baxuko airelinea. Aspaldian isildutako adiskidea. Ez zait gustatzen poesia (Lourdes Oñederra) Ez zait gustatzen poesia iruzur egiten duelako. Esaten du “udaberriak loreak dakartza” baina denboraren igarotzeaz ari da. Edo, “joan zinenetik egunak kolorea galdu du”, baina askotan da eguna urdin, zerua urre, zu gabe ere. Gainera, ez zinen joan hil egin zinen. Ez zait gustatzen poesia iruzur egiten duelako. Esaten du neskak larroxak direla edo lili-loreak baina badakigu ez garela inoiz loreak izan. Ez zait gustatzen poesia ezinak hitzez mozorrotzen dituelako 140 (José Luis Padrón) Ez dakit zer pentsatu, zer sentitu. Ez dakit zer esan. Ez dakit ondo nola azaldu. Nire aurrean zer izan. Hau aukeratu dut eta ez beste bat, baina ez da nahiko, jarri behar dut gezur zatiak jartzen diren bezala. Ehun eta berrogei gehiegi dira, eta guztiak sobratzen zaizkit. Luzeegia da bizitza, laburregia da. Badakit zer pentsatu, zer sentitu. Badakit zer esan. Badakit ondo nola azaldu. Zure aurrean zer izan. Hau aukeratu dut eta ez beste bat, baina ez da kabitzen, kendu behar dut egi zatiak kentzen diren bezala. Ehun eta berrogei gutxi dira, askoz gehiago behar dut. Luzeegia da bizitza, laburregia da. Izana izatekoa (Gerardo Markuleta) “Ni izan naizenarekin...”, eta berriz kontatzen dizkigu betiko bizpahiru pasadizoak, gaur bertan gertatuak balira bezala, entzun gabekoak. “Ni izan naizenarekin...”, eta laster barruko geletan desagertzen zaigu, zer edo zer txukundu, ordenatzera, zerbait bilatzera, lekuz aldatzera. “Ni izan naizenarekin…”, esan eta “Zer egun dugu gaur?”, galdetzen du berriz, egutegirik gabeko lurralde batetik itzuli berri balitz legez. “Ni izan naizenarekin...”, dio amak. Ezagutzen gaitu, baina beste adin, garai batekoak bagina legez, bera ere beste inongo biztanle. “Ni izan naizenarekin...”, eta batek ez daki benetan begietan zer duen: iragan sendo baten gainbehera, edota norbere gero gertukoa. Etxera iritsi (Iñaki Irazu) Etxera iritsi eta ez zinen, itzala bakarrik zokorik zoko itzala jaten. Eta ez ditut argiak piztu nahi izan: pasilo barrena ibili nauzu. Hara honean azkenik sofan etzan naizen arte ilunari emana luzean luze Zertarako ba piztuko nituen, benetako argia behar nuena, zure begiak baziren? Jada iritsi diren barbaroen zain (Harkaitz Cano) “Maisua, aizu… Zer berri, maisu? Han zer datorren ba al dakizu?” “Susmoa badut –ez nago ziur–, ote datozen sasoiak ilun... Nik mugarik ez nuen pasatu: baina mugak ni nau zeharkatu”. “Maisua, aizu… Zer berri, maisu? Han zer datorren ba al dakizu?” “Jarraitzen dugu, barbaroen zain: gertu daudela, badakit orain. Hobi zulatzen ote dabiltza? Zelaian ihintza, pistolak mintza”. “Maisua, aizu… Zer berri, maisu? Han zer datorren ba al dakizu?” “Hango berririk deus ez dakigu; ekiak bista itsutu digu... Betikoa da betiko lege: horizontean sinetsi hobe”. Kontraesanak (Iban Zaldua) Beldurrik ez izan kontraesanei Kontraesanak dira bizitza bera-eta Maita itzazu maita zure kontraesanak Asfaltokume petoa naiz baina mendiko arropa janzten dut, zer besterik. Korrikan beti noa dortsalez baina lagunekin, gaztelaniaz, no te jode. Ni naiz kulturzale amorratua baina CDak eta filmak saretik jaisten ero moduan. Zapi islamikoa matxista da baina zure takoi puntadunak zein naturalak Ezker abertzaleko beteranoa naiz baina ETAren super-aurka egon naiz betidanik. Demokraziaren alde buru-bero baina hemen ez da inoiz torturatu, kontuz gero. |