Tonetti anaiak Hitzak |
Kathrine Switzer
(Jabier Muguruza) Mila bederatzirehun eta hirurogeita zazpian urtero bezala maratoia Bostonen eta lehen aldiz emakume bat da bertan saiatu: Kathrine Switzer Ondoren betikoa gertatu da: gizon batzuk hasi zaizkio bultzaka eragozten, beste batzuk berari laguntzen, gainerakoak geldi begiratzen eta emakumerik franko ere bada eraso egiten Erasoari emanak andreak ez direla hartarako gauza diote, baina Kathrine gihartsuak kontrakoa frogatu: oztopoak oztopo helmugara iritsi Handik gutxira hirurogeita hamalauan New Yorkekoa irabaziko du: kontrakoen argudioak zorroztu arren Kathrine berriak helmugan azkartzen Tonetti anaiak (Jabier Muguruza) Behin batean Tonetti anaiak ezagutu nituen, aitaren lagunak omen ziren Euren roulottean izan ginen gonbidaturik, Oliver pailazoa kantzontzilotan… hantxe! Mutil koskorra nintzen orduan pozez zoratzen ibili nintzen haien ondoan Urte gutxira Oliver pailazoa papera zuena hila zen… buruaz beste eginda Ta neu nintzen mutiko hura harri eta zur geratu zen ulertu ezinik Orain Alegriak lasaitu nau asko “Emak Bakia” bere pelikula horri eskerrak Ikasi baitut Clown bat ez dela inoiz hiltzen: Fellinik berak horixe omen zioen Eta halako pisu arraro bat kendu dut gainetik: izan´e Clown bat… Clown bat… Neu nintzen mutiko hura bere onera etorri da, hori ohartuta Beti ondo daudenen gezurrak (Harkaitz Cano) Beti ondo gaudela, ez nahi adina... Barruan daukaguna ez denez arina. Gezurra ez den arren ez da egi oso: esango al diogu elkarri eroso? Egia kontu zaila, erradiaktiboa, superheroientzako ez da praktikoa... Gezurrak esateko lehenengo baldintza: memori ona eta mozorrotu hitza. “Egia zango luze, gezurra hanka motz” hala diote baina, ni ez nago ados: gezurti asko dabil hor barrena airos, egia bazterrean odolusten aiztoz. Hitza arma zuria zurikerietan, edota laban fina bizkar samurretan. Hitza baino gehiago maite dut ahotsa, salatzen ditu dardar, beldur eta lotsa. Hitzak sarri ez dira ezer esateko baizik eta guztia ezkutarazteko: eskura zen egia basoan gorde da, eguzkia mendebal gorrian bezala. Mutu irauten dugu ezer esan gabe, argazki baterako biok ondo gaude. Bihar bueltan berriro “zer moduz?” galdezka: barrua trumoitsua, begietan festa. Azaorak baditu gauza onak (Iñaki Irazu) azaroak baditu gauza onak oso gauza onak esango nuke, are: ekartzen duen hotza adibidez nigana itten zaituna iluntzean ohera itten dugunean izaren artean, uzkur beroaren bila, besarkada atxekiz: zure epela ez bainuen lehen hain samur bilatzen… uda betearen aroan beroak uxatu´re itten gintuen! bide gorde isilak matte dittu bihotzak, maite dun harekin lotzeko: neguak ´e halakoxeak opa dizkigu! Egunkari puska bat (Lourdes Oñederra) Otsailaren zazpia, igandea. Marta urrutitik ikusi dut beste neska batekin. Hizketan zihoazen. Amak esan dit Ikerren gurasoak banandu egingo direla. Banekien, Ikerrek kontatu zidalako. Iker gixaxoa, esan du amamak. Eta ez dakiela zer gertatzen den orain Lehen ere bazirela arazoak familietan. Asteazkena, hilak hamar. Gaur Martak “hola” esan dit, “Hola, zer moduz?”, erantzun diot, baina ordurako aldenduz zihoan. Nik Ikerrekin segitu dut eskolako irteerarantza. Ikerrek ez du ia hitz egiten eta niri pena ematen dit. Eta amamak ez daki zer gertatzen zaigun ba omen ziren lehen arazoak familietan. Astelehena, martxoak zazpi. Gaur euri asko egin du eta ez dut Marta ikusi. Gaixorik dagoela esan dute gelan. Gripea izango du jende asko dago gripearekin. Ikerrek pena ematen dit baina ez diot berari esaten. Eta amamak ez daki … Martxoaren hamabosta, asteartea. Amak amama medikura lagundu du. Aita eta ama ez dira bananduko. Gaur ere ez da etorri Marta eskolara esan digute ez dela beste inoiz etorriko urrutira joan dela bizitzera bere aitari zerbait gertatu zaiolako politikako zerbait, uste dut. Eta amamak ez daki... Ez da komeni exajeratzea (Jabier Muguruza) Elkarrizketa guzietan galdera bera: gehien eragin zidan musika zein izan nuen: sehaska kantak erantzuten nien, sekula abestu ez zizkidaten haiexek, alajaina! Baina aizue, aizue ez da komeni exajeratzea Loreak eder dira, baina azak ere ez ote haiek bezain eder? Hugue handiak zioenez, zoragarriak, Chef-d¨Oeubre del Grand Seigneur! loreak eder dira bai, konforme, baina aizue... Itxasotik urrun ezingo nintzake bizi erran zautan neska hark, hain samur, hain goxo, nik ezin ba kontra egin! baina bizi edonon liteke, kostaldean akaso: baina aizue... Lagunak izatea nire kasuan handia da, dudik ere, dudik ere… elkar zaindu, elkar maitatu altxorra da dudik ere, dudik ere… baina ez al da norbera lehena? aizue, gauzak ez dira onetik atera behar Lurraren izenak (Gerardo Markuleta) Gu iristerako mundua bada izen bitxiz betea: Olaa, Triana, Mojasoro, Udana. Lurraren izenak zubiak dira, denboraren uberak. Zañartu, Ubao, Olapoto, Berezao. Ez gara lehenak hemen hauetan berbetan ibiliak. Osinurdin, Garai, Ahuntzerreka, Garibai. Gizaki musika hartu du lurrak, lur hotsa gizakiak. Murguzur, Koroso, Jaumendi, Torreauzo. Lurrari loturik leku izenak, gu bagoaz igaro. Duru, Mirubizkar, Zubillaga, Goribar. |