|
Kitarra bat nintzen Hitzak |
1. LEIHATILATIK Porlan kamioiak badira, ardatzaren bueltan jiraka, ontzi piratak bailiran, barne mugak zeharkatzen, nire auto aurretik. Badira ibai hotzak eta mendi elurtuak, zuhaitz biluziak eta aziendak larrean. Badira, batez ere, gizonak eta emakumeak, ez ni ezagutu ez nik ezagutzen ditudanak. Trenak ere badira beilan aberrigabe pasatzen; lanbro finaren erromes, hezetasuna garraio xede jakinik ez. Ez aberririk dago, ez banderarik ere, ez bada izarrekiko gizonen mintzamolde zikin koartelekoan. Hitzak: Inazio Mujika Iraola. Musika: Jabier Muguruza. 2. LEPO BELTZEAN Xamur-xamurra saxoaren hotsa gaueko isilean bihotzaren lagun Bufanda leuna balitz bezala gauaren lepoan saxoaren hotsa. Bihotzaren boza zara zu gau isilaren lepo beltzean. Hitzak: Iñaki Irazu. Musika: Jabier Muguruza. 3. TRIKUARENA Esnatu da trikua habi hosto lehorrez egindakoan, eta dakizkien hitz guztiak ekartzen ditu gogora; gutxi gora behera, aditzak barne, hogeitazazpi hitz. Eta gero pentsatzen du: Amaitu da negua, Ni trikua naiz, Bi arrano gora dabiltza hegaletan; Marraskilo, Zizare, Zomorro, Armiarma, Igel, Zein putzu edo zulotan izkutatzen zarete? Hor dago erreka, Hau da nire erresuma, Goseak nago. Ordea bertan gelditzen da bera ere hosto lehor balitz, artean ez baita eguerdia baino, eta lege zahar batek galerazi egiten baitizkio eguzkia, zerua eta arranoak. Baina gaua dator, joan dira arranoak, eta trikuak, Marraskilo, Zizare, Zomorro, Armiarma, Igel, Erreka utzi eta mendiaren pendizari ekiten dio, seguru bere arantzetaz nola egon baitzitekeen Gerlari bat bere ezkutuaz, Espartan edo Corinton; Eta bapatean, zeharkatu egiten du belardiaren eta kamio berriaren arteko muga, Zure eta nire denboran sartzen da pauso bakar batez; Eta nola bere hiztegi unibertsala ez den azkeneko zazpi mila urteotan berritu, ez ditu ezagutzen gure automobilaren argiak, ez da ohartzen bere heriotzaren hurbiltasunaz ere. Hitzak: Bernardo Atxaga. Musika: Jabier Muguruza. 4. AHOPEAN Hala bada eta benetan oherako keinu garbia egin badik, amore emantzak, ez hadi larritu, eta soseguz egizak bisita haren lurralde epelera. Eskertu ezak apal ederraren opari iheskorra. Eta ez hadi gero gizon portatu. Hitzak: Jon Iriberri. Musika: Txema Garcés. 5. HAURRAK HAUNDITZEN DOAZ Ilunabarrean, nekatuta gaude. Gehiegi sinistu dugu edo gutxiegi, agian. Haurrak haunditzen doaz. Egunero daude mila harri bidean traban jarriak, armiarmak bezela burmuinean eta loa astunagoa da eta amodioa ohizkoagoa. Eta zure begi tristeak daude, konturatu zinelako arrunta nintzela batez ere, ez dela asmakizun harrigarririk bizitzaren ohizko joanean. Baina trenak pasatzen dira eta amesten dugu bidaia ederra. Amesten dugu oraindik goizaldean egunsentiko argiarekin trena pasatzen entzutean. Hitzak: Xabier Lete. Musika: Jabier Muguruza 6. KITARRA BAT NINTZEN Kitarra bat nintzen kolpeka ibiliz gero, desafinatu egiten zena: zu ez konturatu ordea. Akordeoi bat nintzen zu ez konturatu ordea: hauspoari fuerteegi eragin eta nik notarik sortu ezin Ahots bat nintzen zu ez konturatu ordea gehiegi zenuen behartu egin zen urratu. Eta joan zinenean soinua ene baitan askatu gabe geratu zen. Kitarra bat nintzen… Akordeoi bat nintzen… Ahots bat nintzen… Hitzak eta musika: Jabier Muguruza. 7. MUTIKO ARROTZAREN KANTA Mutiko bat da izen arrotz batekin herri arrotz batean mendi-aldeko etxean “Egin lo ume egin lo” amak erraten dio “Herrira noa, laixter naiz” gauetan ama herrira da. Aita urruti da ama, berriz, gauero herrira tabernetan ikusten dute edatea atsegin duela diote Berandu da gauean inor ez da inguruan haizea entzuten da euria baita sarritan Berandu da bainan iritsi da azkenean sarrail hotsa sentitu du mutikoa lotan da azkenean mutikoa lotan da azkenean. Hitzak: Iñaki Irazu. Musika: Jabier Muguruza. 8. OROITZAPENAK Musika: Roberto Yaben (Manuel Yaben-i dedikatua). 9. ZUBIONDOKO GAZTAINATZE Gaur goizean lanera bidean erdilotan autobusean paretik pasatzean Zure ederrak jotzean jabetu naiz bapatean iritsia dela udaberria Zubiondoko gaztainatze Isil-misil txintik gabe argiaren aroan gaude ernaminak jota zaude Aldabak lez atean ezustean jo nauzu eta ene barruan zerbait mugitu didazu “Askatu zeu ere argiaren aroan gaude!” dei egin didazu Zubiondoko gaztainatze “Jaio zeu ere bizi berrira nirekin batera lotan baitzaude” “Zabaldu leihoak alderik-alde airea dadin zokotan barne” “Utikan bertatik traste zaharrak enbarazu besterik egiten ez dutenak” “Bota zakarrera eskutitz zaharrak dagoeneko iraganak jota daudenak” “Ahaztu gabe armairu zokoan maiztua duzun alkandora zatarra” “Kitatu zure zorrak itzuli inork zuri aspaldi utzitako liburu hori” “Astindu gogotik oroitzapen zakarrak bertan diren itzal gorrak” Gaur goizean… Berritu zeu ere argiaren aroan gaude berritu zeu ere Zubiondoko gaztainatze. Hitzak: Iñaki Irazu. Musika: Roberto Yaben. 10. URTAIN Ukabilak harrotu dira gauaren baitan, gogor ukabilak askatu dira ilunaren aurka, zurtz Aizkorak harrotu dira etxeko atarian altzairuaren diztira ernea zaik begietara Ez duzu itzultzerik behin utzitako etxera, ez dago biderik araua hautsi delarik Eta bizkar emanda atzera egin behar jaio zinen arana betirako utzita Eremu idorrean ortzean zehar hodeiak bertan arrotza haizena ekartzen gogora Bertan ez duk gero euriren hots xamurrik aspaldiko lagun-arteko gizon haien jatortasunik Ukabilka, ukabilka gauaren baitan ukabilka, ukabilka ilunaren aurka. Hitzak: Iñaki Irazu. Musika: Jabier Muguruza. 11. IKUSI ZINTUDAN Musika: Jabier Muguruza. |
|