|
|
Bikote Bat Hitzak |
1. Bikote bat
Harkaitz Cano Bikote bat gela hutsean: gizonak pentsatzen du, eskua kokotsean; eta andreak pentsatzen du, zutik, leiho ondoan. Gizonak, ez duenean nora, eskua darama kokotsera, andrea, ez duenean nora, oinez doa leihora. Gizona pentsatzen ari da nola egin esateko esan ezin dena; nola esan ez egitekoren bat egin duela. Andrea pentsatzen ari da nola hasi esaten bukatu dela; nola bukatu inoiz erabat hasi ez zena. Gizonak eskua kokotsean, andrea zutik leihoan. Biak nola esan, zer egin pentsatzen. 2. Arima lapurra Iñaki Irazu Zuhur ibiltzeko ari dira esaka bazter guztietan, arima lapurra omen dabil malgu, arin. Irri zuri bat hitz zuri bat eta arima lapurtua dizu konturatu ere egin gabe. Oso arriskutsua dela diote, harremana hasiz gero ezin duzula atzera egin Irri zuri bat hitz zuri bat eta berarena zara, lagun eskua erabili beharrik gabe Hitz zuri bat irri zuri bat eta uste gabe jabea duzu, lagun, arima kendua dizu 3. Gosari jendetsua Gerardo Markuleta Katilu urdin ilun biok –“Made in Britain”– Lindak erosi zituen, “Dena Ehunean”; elkarrekin bizi ginela orain dela mila urte. Ezti argi urrezko hau –“mila loren ezti jator”– senarraren herrian lortu zidan behin Martak, tarteka ohaide ginela, duela hiruzpalau mende. Pomelo-uraren ohitura Daimarekin hartu nuen; fresko eta garratz punttua, itsas berrien berria eman zidan, azal ilun, aspaldian, aspaldian. Kafea turkiar erara gertatzeko ontzi bitxia Anaren erregalia nire hogeigarrenean, ilea artean luze nuela, aurreko bizi batean. Zure konpainia berriak goxatzen dit ohiko gosaria; ez dezatela nire konpainia zaharrek zure gosari berria mikatz. Lasai hartzazu, laztana: kurasanak eta musuak egun-egunekoak dira. 4. Gauez iristea Lourdes Oñaederra Gustatzen zait gauez iristea urrutiko lekuetara. Hiri berri bat gauez gertuago dago gertuago sorlekutik eta ematen du leku hori ez dela erabat berria ez dela erabat arrotza. Gauez epelago dira distantziak hirietako kaleak ezagunagoak, nola esan, gureagoak. Inoiz ikusi gabeko hiri batera gauez iristean ematen du orduan ez dela lehen aldia, ez dela lehen aldia. Gustatzen zait gauez itzultzea itzultzea etxera eta gauez ibiltzea nire kaleetan urrutikoen antza handiagoa dute orduan jolas naiteke, amets egin han nagoela eta ez hemen ez naizela itzuli osorik 5. Euria ari badu José Luis Padrón Eta euria ari badu, aterkien gainetik irtengo naiz kalera, laino beltzen argitasunez betea. Eta eguraldia oso txarra bada, lasterka joango naiz zugana lasterka joango naiz zugana. Eta euria ari badu, behin eta berriro eroriko naiz zure begien putzuan, gero eta beherago. Eta eguraldia oso txarra bada, arrain baten gisan zurekin ibiliko naiz bueltaka. Eta euria ari badu, ezer ez da izango nirea: munduko izaki zurekoiena. Eta eguraldia oso txarra bada, erakusleihoetan gordeko gara, maniki biluziak bezala. Eta euria ari badu, egunen itsasora joko dute zure bizitzak eta nireak. Eta eguraldia oso txarra bada, arropa bustiaz ezkonduko gara arropa bustiaz ezkonduko gara. 6. Estralurtarrak Rikardo Arregi Diaz de Heredia Hawking handiak esan berri du hobe dugula isilik egon, diskretu izan unibertsoan, apal jokatu, zer gerta ere, estralurtarrak guztiz onberak izango diren ziur ez dela. Adimendua eta gaizkia askotan dira adiskideak. Kontuz ibili galaxiekin, kontuz ibili zulo beltzekin. kontuz ibili ET horiekin. Estralurtarrak, estralurtarrak, geldi zaitezte zuen planetan. Hobe bakarrik unibertsoan, lagun gaiztorik ez dugu behar. Mundu berriak deskubritzea zer den dakigu, galdetu hortik, Ameriketan, Afrika hartan. Gu geu on-onak ez gara izan, elkar hiltzeko oztoporik ez, sekula, inoiz, ez dugu izan. Kanta dezagun apal-apalki, zarata gutxi, hobe isilik, hobe bakarrik unibertsoan. Estralurtarrak, estralurtarrak… Lur planetako biztanleria ez da jadanik utopikoa. Azkar gabiltza, zoro, gainera, zeregin asko dugu guk beti: komunera joan, jana erosi, mezuak ikusi, azkar mozkortu, lanera joan, sosak zenbatu, arlote bizi, pixkanaka hil. Kanta dezagun apal-apalki, zarata gutxi, hobe isilik, hobe bakarrik unibertsoan. Estralurtarrak, estralurtarrak…. 7. Lausoa kristalean Iñaki Irazu Begiak busti egin zaizkizu sukaldean gosaltzen solasean ari ginenean. Eta beldur izan nauzu ez bainekien zer egin zure malkoekin Leiho kristalean lausoa zen eta ez kanpoan ari zuen euriagatik: ganbaran den harpa beltz tzar horrek badakizu nola jotzen duen Euria ari zuen bide ertzeko harria garbitzen biharamunean eser gintezen baina beldur izan nauzu ez bainekien zer egin zure malkoekin 8. Cansancio Javier Rodríguez Marcos Tumbado, mira al cielo, se deja ir. Las nubes están en su cabeza. Nada nuevo allá afuera, y es más que suficiente. Ni pájaros ni aviones detrás del pensamiento. Quiero decir: tiene la mente en blanco, piensa en prosa, llega por la colina del misterio y, cansado, sin ideas, sin ganas de buscarle sentido a sus actos, con toda la pereza del mundo se tumba en el poema. 10. Paradisurako jaioak gara Bernardo Atxaga Paradisurako jaioak gara. hala nola txoriak airerako; paradisuaz behera ez dugu ezer ere nahi, ezer ere ez. Eta nahiz arau orok baduen Salbuespenen bat edo bi, eta teorian sukar izpi bat edo min txikiren bat han edo hemen erraz onartuko genukeen halakorik ere ez, arren, benetako paradisu batek un paradis comme il faut ezin duelako salbuespenik izan, eta gu paradisurako jaioak garelako, denok paradisurako hala nola txoriak airerako. |
|
|
